Хүмүүний бие сэтгэлийг 84 мянган нисванисын муу сэтгэл хорлодог. Түүнийг ариусгах, арилгах, хамгаалах ерөндөг болсон 84 мянган судар тарнийн номыг бурхан багш айлдсан. Мунхаг нисванисын сэтгэл нь өвчин бүгдийн шалтгаан болдог.
Тарнийг байнга уншиж, бясалга. Тарнийг тоолж уншсан хүнд асар том өөрчлөлт гарна. Тарни тоолох, унших дараалал:
1. “Итгэл” бол бурхан Гончигсүмтэй холбогдох үүд хаалга /Гурван удаа уншина/.
2. Манал бурхны ерөөлийг талбихдаа “Би бээр бурхны хутгийг олох хүртлээ үргэлж сайн төрөлд, илүү сайн, сайхан хүн болж төрөн номын сайн нөхөдтэй уулзаж, хүний сайнтай саданлаж, буян хишгээ үргэлжид арвижуулан дэлгэрүүлж байх болтугай” хэмээн сэтгэх нь зүйтэй.
3. Манал бурхны тарнид багтаагүй юм үгүй бөгөөд “Хамаг амьтан бурхны ариун оронд төрөх болтугай” хэмээн бодно.
4. Манал бурхны зориулга ерөөл хүсэлт соёрхол унших. Өдөр бүр Манал бурхны тарни тоолж дууссаны дараа тэрхүү буянаа шамшигдахгүй хэмээн сэтгэж, “Манла бурхан юу гэж айлдсан, түүнчлэн би суралцъя. Тэр явсан бүх буянаа бодьсадва хүртлээ зориулъя” хэмээн бодож Манал бурхны зориулга ерөөл хүсэлт соёрхлыг уншина.
Манла бурханы мөргөл ба тарни Нигүүлслээр бүхнээ тэгш төгс ялж нөхцсөн Нэрийг нь дуулах төдийд муу заяааг арилгагч Хорт сэтгэлийн өвчинг арилгагч эмийн манлай Бэндүряан гэрэлт хаан түүнээ мөргөн тахимой Дадаята ум бэхаанзэ бэхаанзэ маха бэхаанзэ бэхаанзэ ранза самудгадэ суухаа Төвдөөр Түгжээ гүнлаа нинбий жомдаан дай Цанзам тойви андоо дунал сэл Дүйсүм надсэл санжай манжий лаа Бэндүр райеи одлаа чанцаллоо Дадаята ум бэхаанзэ бэхаанзэ маха бэхаанзэ бэхаанзэ ранза самудгадэ суухаа
МАНАЛ БУРХАНЫ ТУХАЙ
Манал бурхан нь хамаг амьтдыг өвчин зовлонгоос гэтэлгэх их ерөөл тавьсан бурхан юм. Өвдөж зовдоггүй нэгээхэн ч амьтан үгүй. Өвчин зовлонгоос салахад сүсэг бишрэл ба итгэл үнэмшил маш чухал үүрэг гүйцэтгэдгийг орчин үеийн сэтгэл судлаачид нотлосон буй. Ууж буй оновчтой эм, эмчилж буй сайн эмч, мөн өвчин зовлонгоос ангижруулагч бурхан шүтээндээ залбирч чин сэтгэлээсээ шүтэж чадвал эдгэхгүй өвчин гэж үгүй.
Монголчууд эрт үеэс “сэжгээр өвдөж, сүжгээр эдгэнэ” гэсэн нь үүнтэй холбоотой ажээ. Хүн буян бага үйлдэж, нүгэл их үйлдэх болсон цаг үеийг цөвүүн цаг гэх бөгөөд энэ үед эдгэшгүй өвчин асар ихээр гарах болно гэж эртний мэргэдийн лүндэнд байдаг. Эдүгээ өвчиний хувьсан өөрчлөлт, түүнийг эдгээх эмийн хүчин чадал, наад захынэдгэшгүй ханиад томуу зэргээс харахад цөвүүн цаг ирсэн нь тодорхой.
Тэгвэл Манал бурхан нь “Цөвүүн цаг болох үед миний адис жинлавын хүч чадал улам нэмэгдэж, өвчин зовлонд нэрвэгдсэн хамаг амьтдыг зовлон зүдгүүрээс нь түргэн гэтэлгэх болтугай” хэмээн аугаа их ерөөл тавьсан бурхан тул бид бүхэн сайтар шүтвээс энэ цаг үед эрүүл саруул, энх тунх амьдрахад асар их тус нэмэртэй байх болно.
Манал бурханы номыг унших үед юу бодох вэ?
Манал бурханы лагшин хөх өнгөтэй, хоёр мутрын баруунаар эмийн ургамал, зүүнээр бадар аяга барьсан, хоёр хөл очир завилгаагаар оршин байдаг. Энэхүү Манал бурхан маш бодитойгоор өөрийн өмнөх огторгуйд заларч ирсэн байна.Ном уншихын сацуу түүний лагшинаас асар ариун цагаан өнгийн гэрэл цацарч миний биеийн оройгоор орж бүх биед түгсэнээр биед байсан өвчин хийгээд өвчиний эх үүсвэрүүд хар өнгийн зүйл болон хувирч биений доод хэсгээр гэрэлд хөөгдөн гарч байна.
Улмаар бие, хэл, сэтгэл гуравт Манал бурханы лагшин, зарлиг, таалалын адис жинлав шингэж энэ адил эцэг, эх тэргүүтэй хамаг амьтан Манал бурханы адис жинлавыг хүртэж байна, амьтан бүгд өвчин зовлонгүй, амар амгалантай болж байна хэмээн бясалгана.
Манал бурханы адистидынхүчээр хамаг амьтан өвчин зовлонгоос түргэн салах болтугай, хэрэв өөрөө өвдөж буй бол Манал бурханы лагшингаас цацарсан гэрлийг өвдөж буй газартаа удаан байлгаж “Миний өвдөж буй энэ өчүүхэн зовлонгоор хамаг амьтдын асар их өвчин зовлон амирлах болтугай” хэмээн залбираарай. Энэхүү бясалгал нь өөрийн өвчинг хялбар давах сэтгэлийн их эрч хүчийг өгдөг нарийн увидас юм.
Ном уншсаны ач тусыг бүрэн дүүрэн хүртэхийн тулд тухайн номонд итгэл үнэмшилтэй байх нь хамгаас чухал байдаг. Тийм учраас энэ номыг унших үед цэвэр ариун сэтгэлтэй байж, итгэл үнэмшил, их сүсэг бишрэлийн үүднээс номоо сонсоорой. Орчлонд энэлэгч амьтан бүхэн Манал бурханы адистидийн хүчээр элдэв өвчин зовлонгоосоо түргэн гэтэлж, эгнэгт эрүүл энхээр амьдрах болтугай.