Зарим хэрэглэгчид мах сонгон авч чадахгүйгээсээ болж хатуу мах худалдан авч хохирч байдаг. Хэрэв та хатуу мах худалдан авах юм бол түүнийг дараах аргаар зөөлрүүлж хүнсэнд хэрэглээрэй.
-Махны модон дээр тавьж байгаад хүнсний төмөр юм уу модон алхаар сайтар нүднэ. Байхгүй бол хутганыхаа ишээр ч нүдэж болно.
-Даагдахын аргагүй хатуу махыг хоол хийхээс хэдэн цагийн өмнө гичээр бүрэн хучиж түрхэнэ. Харин яг хоол хийхийн өмнө махаа сайтар угаахаа мартуузай.
-Хэрэв хатуу мах шарах гэж байгаа бол нимбэгийн шүүс түрхэж шингэтэл хүлээнэ. Үүний дараа сайтар халаасан хайруулын тавагт хийж шарвал хатуу мах их зөөлөн болдог.
-Хэрэв хатуу махыг жигнэж байгаа бол дундуур нь 2 халбага дарс юмуу 1 халбага цууны хүчил нэмээрэй.
Улаан мах буюу малын мах хүнсэндээ хэрэглэх нь эрүүл мэндэд сайн эсэх талаар өргөн маргаан судлаачдын дунд үргэлжилсээр байдаг. Ихэнх судлаачид улаан махны хэрэглээг аль болох багасгавал эрүүл мэндэд сайн гэж зөвлөдөг юм.
Харин саяхан хийсэн нэгэн судалгааны үр дүнд мах, сүүн бүтээгдэхүүн тогтмол хэрэглэснээр зүрхний эрүүл мэндээ сайжруулж, цаг бусын үхлээс сэргийлж болно гэдгийг тогтоожээ.
Канадын МакМастерын их сургуулийн хэсэг судлаачид дэлхийн 50 гаруй орны 218,000 хүний хоолны дэглэмийг таван бүлэгт хувааж судлаад ийм дүгнэлтэд хүрсэн байна.
Улаан мах болон сүүн бүтээгдэхүүнийг өдөр бүр тогтмол, тааруулж хэрэглэвэл зүрх судасны өвчнөөс сэргийлэх боломжтой гэжээ.
Тэд судалгааны тайлангаа Германы Мюнхен хотод болсон Европын Кардиологийн Нийгэмлэгийн чуулган дээр танилцуулсан байна.
“Мах болон сүүг жимс, ногоо, самар, загас зэрэг бусад хүнстэй тэнцүүлж, тааруулан хэрэглэдэг хүмүүс зүрх судасны өвчлөлөөс сэргийлэх бүрэн боломжтойг харууллаа” хэмээн судлаачдын нэг доктор Эндрью Менте ярьжээ.
Нэг үгээр хэлбэл аль нэг хүнсийг дангаар нь хэтрүүлж хэрэглэлгүй, олон төрлийн хүнсийг тэнцвэртэй хэмжээнд хэрэглэвэл эрүүл амьдарна гэж дүгнэсэн байна.
Улаан мах гэдэг ангилалд түүхий үедээ улаан өнгөтэй, болгосны дараа бараан өнгөтэй болж хувирдаг махыг оруулдаг. Жишээ нь загас, тахиа, шувууны мах улаан махны төрөлд багтахгүй бол үхэр, хонь, гахайн мах энэ төрөлд харьяалагдах юм.